Vergi öhdəliyinin yerinə yetirilməsi müddətinin uzadılması Qaydalarının təsdiq edilməsi barədə Azərbaycan Respublikasının Nazirlər Kabinetinin Qərarı

Azərbaycan Respublikası Vergi Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə məsələləri haqqında Azərbaycan Respublikası Qanununun və bu Qanunla təsdiq edilmiş Azərbaycan Respublikası Vergi Məcəlləsinin tətbiq edilməsi barədə Azərbaycan Respublikası Prezidentinin 2000-ci il 30 avqust tarixli 393 nömrəli Fərmanının icrasını təmin etmək məqsədi ilə Azərbaycan Respublikasının Nazirlər Kabineti qərara alır:

1. Vergi öhdəliyinin yerinə yetirilməsi müddətinin uzadılması Qaydaları təsdiq edilsin (əlavə olunur).

2. Azərbaycan Respublikasının Vergilər Nazirliyinə tapşırılsın ki, mütəmadi olaraq müddəti uzadılan vergi öhdəliklərinin məbləği barədə Azərbaycan Respublikasının Maliyyə Nazirliyinə məlumat versin.

3. Bu qərar imzalandığı gündən qüvvəyə minir.

Azərbaycan Respublikasının Baş naziri A. RASİ-ZADƏ.

Bakı şəhəri, 23 fevral 2001-ci il

Vergi öhdəliyinin yerinə yetirilməsi müddətinin uzadılması Qaydaları

Bu Qaydalar Azərbaycan Respublikası Vergi Məcəlləsinin 85.9-cu maddəsinə uyğun olaraq hazırlanmış və vergi öhdəliklərinin yerinə yetirilməsi müddətinin uzadılması qaydalarını tənzimləyir.

1. Ümumi müddəalar

1.1. Vergi öhdəliyinin yerinə yetirilməsi müddətinin uzadılması-vergi (vergilər) üzrə müəyyən olunmuş ödəmə müddətinin dəyişdirilməsidir.

1.2. Vergi öhdəliyinin yerinə yetirilməsi müddətinin uzadılması mövcud olan öhdəliyi ləğv etmir və yeni vergi öhdəliyi yaratmır.

2. Vergi öhdəliyinin yerinə yetirilməsi müddətinin uzadılması şərtləri və qaydaları

2.1. Vergi öhdəliyinin yerinə yetirilməsi müddəti Azərbaycan Respublikasının Vergilər Nazirliyi (bundan sonra - vergi orqanı) tərəfindən Azərbaycan Respublikası Vergi Məcəlləsinin və bu Qaydaların tələblərinə riayət edilməklə uzadılır.

2.2. Vergi ödəyicisi barəsində vergi qanunvericiliyinin pozulması ilə əlaqədar cinayət işi qaldırıldıqda vergi öhdəliyinin yerinə yetirilməsi müddətinin uzadılmasına yol verilmir.

2.3. Vergi öhdəliyinin yerinə yetirilməsi müddətinin Azərbaycan Respublikasının Vergi Məcəlləsi ilə müəyyən edilmiş müddətdən daha gec müddətə dəyişdirilməsinə aşağıdakı hallarda yol verilir:

2.3.1. təbii fəlakət və digər qarşısıalınmaz qüvvə nəticəsində vergi ödəyicisinə zərər dəydikdə. Bu halda vergi ödəyicisi tərəfindən aşağıdakı sənədlər təqdim edilməlidir: vergi öhdəliyinin yerinə yetirilməsi müddətinin uzadılması barədə əsaslandırılmış müraciət; hadisənin baş verməsi barədə müvafiq orqanın arayışı; baş vermiş hadisə nəticəsində dəymiş zərərin məbləği barədə müvafiq orqanın arayışı.

2.3.2. vergini birdəfəyə ödədiyi təqdirdə vergi ödəyicisinin iflasa uğramaq təhlükəsi olduqda. Bu halda vergi ödəyicisi tərəfindən aşağıdakı sənədlər təqdim edilməlidir: vergi öhdəliyinin yerinə yetirilməsi müddətinin uzadılması barədə əsaslandırılmış müraciət; müraciət edilmə tarixinə vergi ödəyicisinin kassasında, hesablaşma, valyuta, depozit və digər hesablarında vəsaitlərin qalığı barədə müvafiq orqanların arayışı; debitorların və kreditorların adı və VÖEN-i göstərilməklə debitor və kreditor borcları barədə arayış.

2.4. Vergi öhdəliyinin yerinə yetirilməsi müddətinin uzadılması üçün vergi ödəyicisi müvafiq girovun və ya zəmanətin olduğunu təsdiq edən sənədləri vergi orqanına təqdim etməlidir. Müraciət vergi növü (növləri) üzrə onların müvafiq hesabat dövrü üçün qanunvericiliklə müəyyən edilmiş ödəmə müddətinədək təqdim olunmalıdır.

2.5. Bu Qaydaların 2.3-cü bəndində nəzərdə tutulmuş əsaslar olduqda vergi öhdəliyinin yerinə yetirilməsi müddəti vergi ili ərzində 1 aydan 9 ayadək uza-dıla bilər; Təbii fəlakət və digər qarşısıalınmaz qüvvə nəticəsində vergi ödəyicisinə zərər dəydiyi hallarda ödəmə müddəti uzadılmış məbləğə bu müddət ərzində faiz hesablanmır. Vergini birdəfəyə ödədiyi təqdirdə vergi ödəyicisinin iflasa uğramaq təhlükəsi yarandıqda, ödəmə müddəti uzadılan məbləğə bu müddət ərzində hər gün üçün 0,01 faiz miqdarında faiz tutulur.

2.6. Vergi orqanı 30 gün müddətində vergi ödəyicisinin müraciətinə baxır və onu əsaslandırılmış hesab etdikdə, Azərbaycan Respublikasının Vergi Məcəlləsinə və bu Qaydalara uyğun olaraq vergi öhdəliklərinin yerinə yetirilməsi müddətinin uzadılması barədə Azərbaycan Respublikasının Vergilər Nazirliyi tərəfindən təsdiq edilmiş formaya uyğun qərar qəbul edir.

2.7. Vergi öhdəliyinin yerinə yetirilməsi müddətinin uzadılması haqqında müraciət etmiş vergi ödəyicisi həmin öhdəliyin yerinə yetirilməsi üçün girov verdikdə vergi orqanı ilə vergi ödəyicisi arasında girov münasibətləri Girov haqqında Azərbaycan Respublikasının Qanununa uyğun olaraq bağlanmış girov müqaviləsi ilə tənzimlənir.

2.8. Girov qoyulmuş əmlakın dəyərinin müəyyənləşdirilməsi zərurəti yarandıqda, bu dəyər Qiymətləndirmə fəaliyyəti haqqında Azərbaycan Respublikasının Qanununa uyğun olaraq müəyyən edilir.

2.9. Girov müqaviləsinin qanunvericilikdə nəzərdə tutulmuş qaydada etibarsız hesab edilməsi vergi ödəyicisinin vergi öhdəliyini ləğv etmir. Girov müqaviləsinin qeydiyyatı ilə bağlı xərclər vergi ödəyicisi tərəfindən ödənilir.

2.10. Vergi öhdəliyinin yerinə yetirilməsi müddətinin uzadılması haqqında qərarda vergi üzrə borcun məbləği, ödənilmə müddəti, ödəmə müddəti uzadılan verginin növü (növləri), ödənilmə qaydası, hesablanan faizlər, habelə girov və ya zəmanət haqqında qeydlər edilməlidir.

2.11. Vergi öhdəliyinin yerinə yetirilməsi müddətinin uzadılması haqqında qərar qərarda göstərilən müddətdə qüvvəyə minir.

3. Vergi öhdəliyinin yerinə yetirilməsinin uzadılmış müddətinə vaxtından əvvəl xitam verilməsi halları

3.1. Vergi öhdəliyinin yerinə yetirilməsinin uzadılmış müddətinə aşağıdakı hallarda vaxtından əvvəl xitam verilə bilər:

3.1.1. vergi ödəyicisi vergi öhdəliyini vaxtından əvvəl yerinə yetirdikdə;

3.1.2. bu Qaydaların 2.2.-ci bəndində nəzərdə tutulmuş halda;

3.1.3. vergi orqanının vergi öhdəliyinin yerinə yetirilməsi müddətinin uzadılması barədə qərarının şərtlərinə əməl edilmədikdə.

3.2.Bu Qaydaların 3.1.2-ci və 3.1.3.-cü bəndlərində nəzərdə tutulmuş hallarda vergi öhdəliyinin yerinə yetirilməsinin uzadılmış müddətinə vaxtından əvvəl xitam verilməsi haqqında qərar vermiş vergi orqanı 5 gün müddətində vergi ödəyicisinə bu barədə məlumat verməlidir. Vergi ödəyicisi mə`lumatı aldığı tarixdən 30 gün müddətində borc məbləğini və ödəmə gününə qədər həmin məbləğə hesablanmış faizləri büdcəyə ödəməlidir.

3.3. Vergi ödəyicisinin vergi öhdəliyinin yerinə yetirilməsinin uzadılmış müddətinin vaxtından əvvəl dayandırılması barədə vergi orqanının və onların vəzifəli şəxslərinin hərəkətindən (hərəkətsizliyindən) şikayət etmək hüququ vardır.